Մոտ երեք տասնյակ մարդ, ըստ ՏԱՍՍ-ի թղթակցի, երեկ ցույց են անցկացրել Նյու Յորքում Ղազախստանի գլխավոր հյուպատոսության դիմաց։
Ցուցարարները հայտարարել են, որ ցույց կանցկացնեն նաև Հայաստանի գլխավոր հյուպատոսության մոտ, քանի որ վարչապետ Նիկոլ Փաշինյանն է հայտարարել ՀԱՊԿ զորքեր ուղարկելու մասին: Այսօր էլ ցույց են նախատեսում Ռուսաստանի գլխավոր հյուպատոսության մոտ։
Ղազախստանում զանգվածային անկարգությունները սկսվել են հունվարի 1-ից, երբ ուժի մեջ է մտել հեղուկ գազի մեկ լիտրի գինը ավելի քան կրկնակի բարձրացնելու որոշումը: Հետագայում կառավարությունը չեղարկել է որոշումը, սակայն զանգվածային բողոքները շարունակվել են: Նախորդ օրերին դրանք վերաճեցին զինված բախումների, որոբց հետևանքով տասնյակ զոհեր և հարյուրավոր վիրավորներ կան։
Երկրի իշխանությունները օգնության համար դիմել են ՀԱՊԿ-ին, որի հավաքական խաղաղապահ ուժերի տեղափոխումը Ղազախստան կավարտվի արդեն այսօր։
Հայաստանի վարչապետը ներկայումս ՀԱՊԿ Հավաքական անվտանգության խորհրդի նախագահն է և Ղազախստան խաղաղապահներ ուղարկելու որոշման մասին նա է հայտարարել։
