Վաղը՝ փետրվարի 1-ին, տեղի կունենա Ռուսաստանի Դաշնության և Ամերիկայի Միացյալ Նահանգների արտաքին գերատեսչությունների ղեկավարներ Սերգեյ Լավրովի և Էնթոնի Բլինքենի հեռախոսազրույցը:
Այդ մասին այսօր ասել է Ռուսաստանի արտգործնախարարության մամլո խոսնակ Մարիա Զախարովան:
«Դեմ առ դեմ հանդիպում չի նախատեսվում, վաղը տեղի կունենա հեռախոսազրույց»,- ասել է Զախարովան:
Ավելի վաղ ԱՄՆ պետքարտուղարի տեղակալ Վիկտորիա Նուլանդը հայտնել է, որ Բլինքենը և Լավրովն այս շաբաթ պետք է բանակցեն:
Ռուսաստանը Միացյալ Նահանգներից և ՆԱՏՕ-ից պահանջում է անվտանգության երաշխիքներ և, մասնավորապես, հստակ խոստում առ այն, որ Ուկրաինան և Վրաստանը չեն անդամակցի ՆԱՏՕ-ին:
Բացի այդ, ռուսական կողմը Հյուսիսատլանտյան դաշինքից պահանջում է հեռացնել ռազմական ենթակառուցվածքը 1997 թվականից հետո ՆԱՏՕ-ին անդամակցած երկրների տարածքից:
Արևմուտքը մերժել է Մոսկվայի այդ պահանջները, սակայն նշել է, որ պատրաստ է հաշվի առնել ռուսների արտահայտած մտահոգություններն ու շարունակել բանակցություններն անվտանգության հարցերի շուրջ:
