ՄԱԿ-ի գլխավոր քարտուղարը ողջունել է Հայաստանի վարչապետի և Ադրբեջանի նախագահի հանդիպումը, որ կայացավ ապրիլի 6-ին Բրյուսելում՝ Եվրոպական խորհրդի նախագահ Շառլ Միշելի մասնակցությամբ։
«Մեզ ոգևորում է Հայաստանի և Ադրբեջանի միջև ամենաբարձր մակարդակով շարունակվող անմիջական փոխգործակցությունը։ Մենք ի գիտություն ենք ընդունում կողմերի հայտարարված հանձնառությունը հետագա բանակցություններին և կոնկրետ քայլերին՝ ուղղված տարածաշրջանում խաղաղության և կայունության հաստատմանը», – ասված է ՄԱԿ-ի գլխավոր քարտուղար Անտոնիու Գուտերեշի անունից նրա խոսնակի տարածած հայտարարությունում։
Ստեֆան Դյուժարիկը երախտագիտությամբ նշել է Եվրամիության դերը շփումների շարունակմանը նպաստելու գործում և կոչ արել կողմերին բոլոր վիճելի հարցերը լուծել երկխոսության միջոցով ու գոյություն ունեցող ձևաչափերի շրջանակներում:
«ՄԱԿ-ը պատրաստ է աջակցել բոլոր նման ջանքերին, այդ թվում՝ մարդասիրական օգնություն տրամադրելու, վերակառուցման և խաղաղության հաստատմանը աջակցելու միջոցով», – հավելել է Դյուժարիկը։
