«Աբզաս Մեդիա» առցանց հրատարակության բանտարկված տնօրեն Ուլվի Հասանլին բաց նամակով դիմել է դստերը՝ Սուադային։
Toplum TV-ն հայտնում է, որ Հասանլին նամակում ասում է, որ 90 օրից ավելի չի կարողանում տեսնել դստերը։
«Աբզաս Մեդիա»-ի ձերբակալված աշխատակիցների մեծ մասը 3 ամիս խստագույնս մեկուսացվել է։ Մեզ արգելեցին հանդիպել մեր սիրելիների հետ և նույնիսկ հեռախոսով լսել նրանց ձայնը։ Նույնիսկ քեզ՝ 18 ամսական երեխային, թույլ չեն տվել 5-10 վայրկյան գրկել քեզ։ Նույնիսկ հիմա ես չեմ կարող քեզ իմ գրկում պահել։ Ադրբեջանում փաստացի վերականգնվել է սովետական տոտալիտար ռեժիմը, եւ երկիրը կառավարվում է խորհրդային մտածողությամբ»։
Ուլվի Հասանլին նաև նշել է, որ Ադրբեջանի անկախության պատմության մեջ առաջին դեպքն է, երբ լրատվամիջոցը ենթարկվում է տոտալ ռեպրեսիայի՝ իր քննադատական նյութերի պատճառով.
«Կարծես մեզ ուղարկել են աքսորի կամ համակենտրոնացման ճամբար, և մեր ընտանիքի անդամներն էլ են պատժվում ու ճնշումների տակ են պահվում մեր պատճառով։
Ուլվի Հասանլիի փաստաբան Զիբեյդա Սադըգովան «Ամերիկայի ձայնին» ասել է, որ «Աբզաս Մեդիա»-ի աշխատակիցներին արգելվել է հանդիպել իրենց ընտանիքի և հարազատների հետ, և թեև այդ արգելքը վերջերս հանվել է, նրանք կարող են հանդիպել ընտանիքի հետ ապակու հետևում։
«Ուլվին ցանկանում է պահել իր դստերը, բայց նրանց թույլ չեն տալիս ուղիղ հանդիպել բանտում, նրանք կարող են հանդիպել միայն ապակու հետևում։ Ընդհանրապես, օրենսդրությամբ ուղղակի հանդիպման հետ կապված որեւէ արգելք չկա, սակայն նրանք զրկված են այդ իրավունքից»։
Նշենք, որ նախորդ տարվա նոյեմբեր-հունվար ամիսներին ձերբակալվել էին «Աբզաս Մեդիա»-ի վեց լրագրողներ ու մամուլի աշխատակիցներ։ Նրանք մեղադրվում են Քրեական օրենսգրքի մաքսանենգության հոդվածով։ Լրագրողները համաձայն չեն մեղադրանքների հետ և նշում են, որ իրենց ձերբակալությունը քաղաքական պատվեր էր։
