Փետրվարի 29-ին «Freedom House» կազմակերպությունը հրապարակեց «Ազատությունն աշխարհում 2024. թերի ընտրությունների և զինված հակամարտությունների աճող վնասը» զեկույցը։
Toplum TV-ն «Թուրան» գործակալությանը հղումով հայտնում է, որ զեկույցում գնահատվել է 210 երկրներում և տարածքներում մարդկանց քաղաքական իրավունքների և քաղաքացիական ազատությունների հասանելիությունը։
Զեկույցում Ադրբեջանը հայտնվել է ոչ ազատ երկրների շարքում՝ համաշխարհային ազատության ինդեքսում 100 հնարավոր միավորից հավաքելով ընդամենը 7 միավոր։
Ադրբեջանին վերաբերող հատվածում ասվում է, որ երկրում տիրում է կոռուպցիա, իսկ ֆորմալ քաղաքական ընդդիմությունը թուլացել է տարիների հալածանքների պատճառով:
Հաղորդվում է, որ իշխանությունները վերջին տարիներին լայնածավալ ճնշումներ են իրականացրել քաղաքացիական ազատությունների դեմ՝ քիչ տեղ թողնելով անկախ արտահայտվելու կամ ակտիվության համար:
Փաստաթղթի «2023 թվականի հիմնական զարգացումները» բաժնում նշվել է, որ նոյեմբերին Ադրբեջանի իշխանությունները սկսել են ինտենսիվ ռեպրեսիաներ երկրում մնացած անկախ լրատվամիջոցների նկատմամբ.
Մաքսանենգության, ապօրինի շինարարության և ոստիկանությանը դիմադրություն ցույց տալու մեղադրանքով ձերբակալվել են մի քանի լրագրողներ և լրատվամիջոցների ղեկավարներ։
«Freedom House»-ը որպես երկրում ավտորիտար կառավարման հետևանք է նշել Abzas Media-ի լրագրողների, քաղաքական գործիչ և տնտեսագետ Գուբադ Իբադօղլուի ձերբակալությունը, ինչպես նաև կրոնական մարդկանց հետապնդումները։
