Ե՞րբ և ինչպե՞ս Իսրայելը կարձագանքի Իրանին.

Իսրայելի ռազմական կաբինետի նիստը, որը տեւել է մի քանի ժամ, ավարտվել է կիրակի երեկոյան։ Այնուամենայնիվ, արևմտյան և իսրայելական լրատվամիջոցները հայտնել են, որ վերջնական որոշում, թե Իսրայելն ինչպես կպատասխանի Իրանի հարձակմանը, դեռ չի կայացվել։

CNN-ը գրում է, որ Իսրայելի իշխանությունները մտադիր են արձագանքել, սակայն դեռ չեն որոշել ժամանակը եւ մասշտաբները։ Հեռուստաընկերության անանուն զրուցակցի խոսքով՝ զինվորականներին հանձնարարվել է մտածել արձագանքման լրացուցիչ տարբերակների մասին։

Ըստ CNN-ի վերլուծաբան Բարաք Ռավիդի՝ Իսրայելի նախարարներ Բենի Գանսը և Գադի Էյզենկոտն իրենց աջակցությունն են հայտնել արագ գործողություններին, սակայն Իսրայելի վարչապետ Բենիամին Նեթանյահուի և ԱՄՆ նախագահ Ջո Բայդենի հեռախոսազրույցից հետո որոշվել է հետաձգել պատասխանը մինչև երկուշաբթի։

Times of Israel-ը հայտնել է, որ ռազմական կաբինետի նիստը տեւել է մոտ երեք ժամ։ Իսրայելական հեռուստատեսության 12-րդ ալիքի տեղեկություններով՝ կաբինետը կրկին կհանդիպի մոտ ժամանակներս։

ԱՄՆ պաշտոնյաների խոսքով՝ Ջո Բայդենը հորդորել է Նեթանյահուին լավ մտածել պատասխանի մասին։ Սպիտակ տունը նաև զգուշացրել է Իսրայելին, որ Միացյալ Նահանգները չի մասնակցի Իրանի դեմ պատասխան հարվածներին, հայտարարել են Վաշինգտոնի պաշտոնյաները:

Սպիտակ տան Ազգային անվտանգության խորհրդի ներկայացուցիչ Ջոն Քիրբին ամերիկյան հեռուստաալիքներով որոշ ելույթների ժամանակ ասել է, որ ԱՄՆ-ն Իսրայելին ցույց է տվել, որ փորձում է խուսափել հակամարտության սրումից։ Վարչակազմի ներկայացուցիչները հայտնել են, որ նույն հաղորդագրությունն Իրանին է ուղարկվել դիվանագիտական ​​ուղիներով։