Ապրիլի 15-ին Բաքվի վերաքննիչ դատարանը քննարկել է «Մուսավաթ» կուսակցության և Ժողովրդավարական ուժերի ազգային խորհրդի անդամ Թոֆիգ Յագուբլուի ազատազրկման ժամկետը ևս երկու ամսով երկարաձգելու վերաբերյալ բողոքը։
Փաստաբան Ագիլ Լաջիչն ասաց, որ պաշտպանական կողմը պահանջել է չեղարկել այս որոշումը։
Փաստաբանի խոսքով՝ կալանքի որոշումը երկարաձգելու, Յագուբլուին ընդհանրապես բանտում պահելու պատճառ չկա։
«Թոֆիգ Յագուբլուն միշտ պայքարել է կեղծիքի ու խարդախության դեմ։ Ուստի աբսուրդ է այսօր նրա հասցեին այս մեղադրանքները ներկայացնելը։ Չնայած սրան՝ դատարանը չբավարարեց մեր բողոքը»,- ասաց փաստաբանը։
* Ժողովրդավարական ուժերի ազգային խորհրդի և «Մուսավաթ» կուսակցության համակարգող կենտրոնի անդամ Թոֆիգ Յագուբլուն դեկտեմբերի 14-ին ձերբակալվել է խարդախության և անօրինական փաստաթուղթ պատրաստելու մեղադրանքով։
Նախկինում քաղաքական գործիչը բազմիցս ենթարկվել է քրեական և վարչական պատասխանատվության։ Միջազգային կազմակերպությունները նրան ճանաչել են որպես խղճի բանտարկյալ։