Ադրբեջանի հետ հարաբերությունները կարգավորելու համար Հայաստանը պետք է հրաժարվի առասպելաբանությունից և ապացուցի, որ ոչ մի պահանջ չունի իր հարևանների նկատմամբ։ Այս մասին նախագահ Իլհամ Ալիեւն ասել է ապրիլի 23-ին Բաքվում կայացած միջազգային համաժողովի մասնակիցների հետ հանդիպմանը։
«Հայերը հոգեբանական լուրջ շեղումներ ունեն, որոնք շատ բացասաբար են անդրադառնում հասարակության վրա։ Երիտասարդների հետ հանդիպումներից մեկում նրանք ՀՀ նախկին նախագահ Սերժիկ Սարգսյանին հարցրել են՝ ե՞րբ են հայերը ազատագրելու Արարատը։ Սարգսյանն իր պատասխանում ասաց, որ Ղարաբաղը մենք ենք ազատագրել, իսկ մնացածը ձեր սերունդն է անելու։ Տեսեք, սա այդ հոգեբանական խախտման ապացույցն է»,- ասել է Ալիեւը։
Նա նաև նշել է, որ Ադրբեջանի հետ հաշտություն հաստատելու համար կարևոր է հրաժարվել ոչ միայն նման շինծու գաղափարներից, այլև արդեն կայացված որոշումներից։ Օրինակ, Հայաստանի Սահմանադրությունը նշում է անկախության հռչակագիրը, որտեղ Լեռնային Ղարաբաղը նշվում է որպես Հայաստանի տարածք։
«Եթե Սահմանադրությունից այս հիշեցումը չհանվի, ինչպե՞ս կարող ենք խաղաղություն հաստատել։ Ինչպե՞ս կարելի է խաղաղություն կնքել, եթե Հայաստանի զինանշանը ներառում է Արարատը, որը գտնվում է Թուրքիայում։
Քանի դեռ այդ հարցերը չեն լուծվել, խաղաղության պայմանագիր չի լինի, և Ադրբեջանն ու Թուրքիան միասին աշխատում են այդ հարցում»,- նշել է Իլհամ Ալիևը։