Հայաստանի և Ադրբեջանի սահմանին աճող լարվածությունը մտահոգություն է առաջացրել ՄԱԿ-ում: Այս մասին երեկ ճեպազրույցում ասել է կազմակերպության գլխավոր քարտուղարի պաշտոնական ներկայացուցչի տեղակալ Ֆարհան Հաքը՝ մեկնաբանելով հուլիսի լույս 28-ի գիշերը տեղի ունեցած բախումները:
«Մենք աճող մտահոգությամբ հետևում ենք Հայաստանի և Ադրբեջանի սահմանին լարված իրավիճակի մասին հաղորդումներին, այդ թվում` այսօր գրանցված վերջին միջադեպի վերաբերյալ», – հայտարարել է Հաքը։
«Կոչ ենք անում երկու կողմերին լինել զուսպ, ձեռնպահ մնալ ցանկացած գործողությունից, որը կարող է հանգեցնել էսկալացիայի, և առկա խնդիրները լուծել երկխոսության միջոցով», – ասել է ՄԱԿ-ի պաշտոնյան:
Հուլիսի լույս 28-ի գիշերը և առավոտյան մարտական գործողություններ են ծավալվել հայ – ադրբեջանական սահմանի հյուսիս-արևելյան՝ Սոթքից մինչև Վերին Շորժա հատվածում: Հայկական կողմը հաղորդում է դրանց հետևանքով 3 զոհի և 4 վիրավորի, ադրբեջանական կողմը՝ 2 վիրավորի մասին:
Ռուսաստանի խաղաղապահ զորքերի հրամանատարության միջնորդությամբ ձեռք է բերվել պայմանավորվածություն հյուսիս-արևելյան ուղղությամբ հայ-ադրբեջանական զորքերի շփման գծում հրադադարի ռեժիմը վերականգնելու վերաբերյալ։ Հուլիսի 28-ի ժամը10։40-ից հաստատվել է հրադադար։
Այդուհանդերձ, Հայաստանի պաշտպանության նախարարությունը հաղորդում է այս գիշեր և առավոտյան ադրբեջանական կողմից հրադադարի խախտումների մասին, որոնց հետևանքով վիրավորվել է հայ զինծառայող։
