Միացյալ Նահանգների նախագահ Ջո Բայդենը հանդիպել է բելառուսական ընդդիմության առաջնորդ, 2020 թվականի օգոստոսին կայացած նախագահական ընտրություններում Ալեքսանդր Լուկաշենկոյի գլխավոր մրցակից Սվետլանա Տիխանովսկայայի հետ։
Հանդիպումը տեղի է ունեցել նախօրեին Սպիտակ տանը։ Դրա ավարտին նախագահ Բայդենը Twitter-ի իր օգտահաշվում հրապարակել է հանդիպման լուսանկարը՝ ուղեկցելով այն հետևյալ գրառմամբ․ – «Միացյալ Նահանգները աջակցում է ժողովրդավարության և համընդհանուր մարդու իրավունքների պահպանմանը հասնելու՝ Բելառուսի ժողովրդի ձգտումը»։
Սվետլանա Տիխանովսկայան իր հերթին Twitter-ում գրել է․ – «Այս հանդիպումը համերաշխության ազդեցիկ մի քայլ է այն միլիոնավոր անվախ բելառուսների հետ, որոնք խաղաղ միջոցներով պայքարում են հանուն իրենց ազատության»։
