«Ռուսաստանը շարունակում է շփումները հակամարտության կողմերի հետ՝ եռակողմ համաձայնագրերի կատարումն ապահովելու նպատակով», – այսօր հայտարարել է Ռուսաստանի նախագահի մամուլի քարտուղար Դմիտրի Պեսկովը՝ մեկնաբանելով Հայաստանի վարչապետի՝ Ադրբեջանի հետ սահմանի ողջ երկայնքով ռուսական սահմանապահներ տեղակայելու մասին հայտարարությունը։
«Ռուսաստանի ներկայացուցիչները քիչ ջանք չեն գործադրել հրադադարի ռեժիմը վերականգնելու համար, աշխատանքը շարունակվում է», – հայտարարել է Կրեմլի պաշտոնական ներկայացուցիչը։
Այսօր կառավարության նիստի ժամանակ Հայաստանի վարչապետի պաշտոնակատար Նիկոլ Փաշինյանը հայտարարեց՝ իմաստ ունի դիտարկել հայ-ադրբեջանական սահմանի ողջ երկայնքով ռուս սահմանապահներ տեղակայելու հարցը՝ սահմանազատման աշխատանքներն առանց բախումների անելու համար։
Փաշինյան նշեց՝ հարցը պատրաստվում են քննարկել ռուս գործընկերների հետ։ Մինչ այս Փաշինյանն առաջարկել էր միայն Սոթք-Խոզնավար հատվածում՝ Սյունիքի սահմանին միջազգային դիտորդներ տեղակայել։
