Հայաստանում հունիսի 20-ի արտահերթ ընտրություններով ձևավորված նոր խորհրդարանն այսօր առաջին նիստը կանցկացնի: Պատգամավորները պետք է ընտրեն 8-րդ գումարման Ազգային ժողովի նախագահին, փոխխոսնակներին, ինչպես նաև օրենսդիր մարմնի մշտական հանձնաժողովների ղեկավարներին:
Ընտրությունների արդյունքներով Նիկոլ Փաշինյանի «Քաղաքացիական պայմանագիր» կուսակցությունը 107 -ից ստացել է 71 մանդատ, ինչը թույլ է տալիս ինքնուրույն կառավարություն ձևավորել: Նախատեսվում է, որ Փաշինյանը կուսակիցների կողմից կրկին կառաջադրվի վարչապետի պաշտոնում:
«Հայաստան» դաշինքը երկրորդ ուժն է՝ 29 մանդատով, մյուս ընդդիմադիր ուժը՝ «Պատիվ ունեմ» դաշինքը 7 մանդատ ունի։
Խորհրդարանական մեծամասնությունը կներկայացնեն նոր Ազգային ժողովի խոսնակը և նրա երկու տեղակալները: Ընտրական օրենսգրքի համաձայն՝ երեք փոխխոսնակներից մեկը պետք է ներկայացնի ընդդիմությունը: Սպասվում է, որ խորհրդարանի նախագահ կընտրվի գործող փոխխոսնակ Ալեն Սիմոնյանը:
Բացի այդ, առաջին նիստի ժամանակ նախատեսվում է քննարկել կառավարության կառուցվածքը փոփոխելու մասին օրենքի նախագիծը: Թե կոնկրետ ինչ փոփոխություններ են սպասվում, դեռ պարզ չէ:
