Գերմանիայի Պոտսդամ քաղաքում ձերբակալվել է Մեծ Բրիտանիայի մի քաղաքացի՝ Ռուսաստանի օգտին լրտեսության մեղադրանքով։
Գերմանիայի դաշնային դատախազության հաղորդմամբ, կասկածյալն աշխատել է Բեռլինում բրիտանական դեսպանատանը և առնվազն անցած տարվա նոյեմբերից համագործակցել ռուսական հատուկ ծառայությունների հետ, մասնավորապես՝ առնվազն մեկ անգամ ռուսներին փաստաթղթեր է փոխանցել՝ գումարի դիմաց։
Ձերբակալությունը կատարվել է գերմանա-բրիտանական համատեղ քննության արդյունքում։ Հայտնի է, որ կասկածյալը 57 տարեկան է, սակայն պաշտոնապես չի նշվում՝ ինչ պաշտոն է նա զբաղեցրել և ռուսական հատուկ ծառայություններից կոնկրետ որի հետ է համագործակցել։
