Հայաստանի, Ադրբեջանի ու Ռուսաստանի փոխվարչապետերը վերսկսել են աշխատանքային հանդիպումները՝ տարածաշրջանի ապաշրջափակման շուրջ։ Տեղեկությունը տարածել է Ռուսաստանի կառավարությունը:
Ըստ այդմ, փոխվարչապետեր Շահին Մուստաֆաևը, Մհեր Գրիգորյանն ու Ալեքսեյ Օվերչուկն այսօր Մոսկվայում հերթական հանդիպումն են անցկացրել, որի ընթացքում քննարկել են նոյեմբերի 9-ին և հունվարի 11-ին Հայաստանի, Ադրբեջանի և Ռուսաստանի առաջնորդների միջև ձեռքբերված պայմանավորվածությունների կատարումը։ Եռակողմ խումբը դադարեցրել էր աշխատանքները ամիսներ առաջ, երբ ադրբեջանական զորքը մի քանի կիլոմետր առաջ էր եկել Սյունիքի և Գեղարքունիքի մարզերում։
Փոխվարչապետ Մհեր Գրիգորյանը հայտարարել էր, թե «նման իրավիճակը նպաստավոր մթնոլորտ չի ստեղծում՝ բանակցությունները շարունակելու համար»։ Հայաստանի վարչապետ Նիկոլ Փաշինյանը, սակայն, անցած շաբաթ կառավարության նիստում պնդել էր, թե անհրաժեշտ է վերսկսել բանակցությունները։
«Կարծում եմ` պետք է օր առաջ վերսկսենք աշխատանքները փոխվարչապետերի եռակողմ ձևաչափում և լինենք առավել ակտիվ ու նախաձեռնող տարածաշրջանում նոր կոմունիկացիոն և տնտեսական հնարավորությունների իրագործման տեսանկյունից», – ասել էր վարչապետ Փաշինյանը։
