Գյումրի քաղաքի նախկին քաղաքապետ Վարդան Ղուկասյանի որդին` Սպարտակ Ղուկասյանը ձերբակալվել է՝ իշխանության ներկայացուցչի նկատմամբ բռնություն գործադրելու կասկածանքով, հաղորդում է Քննչական կոմիտեն:
Նշվում է, որ Գյումրիի բնակչուհին դիմում է ներկայացրել` նշելով, որ օգոստոսի 17-ին Վարդան Ղուկասյանը որդու և երեք-չորս տղամարդկանց հետ մտել է իր տան բակ՝ իր թոռան հետ պարզաբանումներ կատարելու նպատակով։
Ոստիկաններն, ըստ ՔԿ-ի հաղորդագրության, այցելել են Գյումրու նախկին քաղաքապետի բնակության վայր, սակայն Սպարտակ Ղուկասյանը նախ՝ հրաժարվել է տան դուռը բացել, այնուհետև՝ ժամեր անց, զանգահարել է իշխանության ներկայացուցիչ հանդիսացող ոստիկանության Կումայրիի բաժնի քրեական հետախուզության բաժանմունքի պետին, սպառնացել բռնություն գործադրել նրա նկատմամբ` կապված վերջինիս կողմից իր ծառայողական պարտականությունները կատարելու հետ:
Քրեական հետախուզության բաժանմունքի պետը ճանաչվել է տուժող և ցուցմունք տվել դեպքի հանգամանքների վերաբերյալ։
Սպարտակ Ղուկասյանին մեղադրանք է առաջադրվել քրեական օրենսգրքի 316-րդ հոդվածի 1-ին մասով։
Նախաքննությունը շարունակվում է։
