ԱՄՆ նախագահ Ջո Բայդենն ասել է, որ Վաշինգթոնն ամեն ինչ անում է Քաբուլից ամերիկացիների և վտանգված աֆղանստանցիների ապահով տարհանումն իրականացնելու համար: Նրա խոսքով, դա շատ դժվար խնդիր է և հնարավոր են բարդություններ:
«Իմացեք, այս տարհանման առաքելությունը վտանգավոր է, մեր զինծառայողների կյանքին է սպառնում, գործողությունն իրականացվում է չափազանց դժվար հանգամանքներում, ես չեմ կարող բացարձակ հաջողություն խոստանալ, բայց որպես ձեր գերագույն գլխավոր հրամանատար, վստահեցնում եմ, որ մենք ամեն բան կանենք, որ տուն բերենք մեր հայրենակիցներին, մենք կգործադրենք մեր բոլոր կարողությունները և լծակները»,- ասել է Բայդենը:
Միացյալ Նահանգները փորձում է Աֆղանստանից ամերիկյան ուժերը դուրս բերել մինչև թալիբների հետ համաձայնեցված ժամկետը՝ օգոստոսի 31-ը:
Ամերիկացիները փորձում են նաև տարհանել վտանգված աֆղանստանցիներ՝ տարբեր ոլորտում աշխատող մարդկանց, ովքեր 20 տարիների ընթացքում համագործակցել են ԱՄՆ պետության և բանակի, ինչպես նաև այլ պետությունների դիվանագիտական առաքելությունների հետ:
Այս օրերին ամերիկացի հազարավոր զինծառայողներ տեղակայված են Քաբուլի Համիդ Քարզայի անվան միջազգային օդակայանում, որտեղ ապահովում են տարհաման անվտանգությունը: Ջո Բայդենը նշել է, որ հարկ եղած դեպքում ամերիկյան ուժերի տեղակայումը կարող է լրացուցիչ ժամանակ պահանջել:
