ԱՄՆ պարենի և դեղամիջոցների դաշնային գործակալությունը պետք է գալիք երկուշաբթի օրը վերջնական հավանություն տա կորոնավիրուսի դեմ Pfizer-BioNTech ընկերության ստեղծած պատվաստանյութի կիրառմանը:
Ենթադրվում է, որ պաշտոնական հաստատումը կհամոզի դեռևս չպատվաստված ամերիկացիներին այդ վակցինայով պաշտպանվել COVID-19-ի դեմ:
Pfizer-BioNTech ամերիկա-գերմանական ընկերության ստեղծած վակցինան անցյալ տարվա դեկտեմբերից արդեն կիրառվում է Միացյալ Նահանգներում և ամբողջ աշխարհում, սակայն ԱՄՆ-ում այն ընդդունվել է ժամանակավոր տարբերակով՝ որպես արտակարգ քայլ համավարակը զսպելու համար:
Միացյալ Նահանգներում նոր դեղամիջոցի հաստատումը բարդ գիտական, տեխնիկական և իրավական գործընթաց է, որը կարող է ամիսներ և նույնիսկ տարիներ տևել:
Ենթադրվում է, որ Pfizer-ի պաշտոնական հաստատումից հետո Պենտագոնը կպատվիրի այդ վակցինայի մեծ խմբակաքան զինծառայողներին պարտադիր պատվաստելու համար:
Ամենայն հավանականությամբ, ԱՄՆ զինվորականների օրինակին կհետևեն նաև քաղաքացիական իշխանությունները:
Միացյալ Նահանգներում այսօրվա դրությամբ կորոնավիրուսի դեմ ամբողջությամբ՝ երկու ներարկումներով, պատվաստվել է չափահաս բնակչության մոտ 60 տոկոսը:
Պաշտոնական հաստատումից հետո բժիշկները նաև կսկսեն ավելի արագ նշանակել երրորդ դեղաչափի ներարկումը, որը պետք է հզորացնի օրգանիզմի իմունային պաշտպանությունը կորոնավիրուսի դեմ:
Առողջապահության համաշխարհային կազմակերպությունը հարուստ երկրներին հորդորում է հետաձգել երրորդ դեղաչափի ներարկումները և այդպես աղքատ երկրների բնակիչներին տալ առաջին դեղաչափը ստանալու հնարավորություն:
