Իսրայելում սկսել են կորոնավիրուսի դեմ պատվաստանյութ տրամադրել 12-ը լրացած երեխաներին և խթանող նշանակության երրորդ դեղաչափը` երկու անգամ պատվաստված բոլոր չափահասներին:
Առաջատար իսրայելցի բժիշկների մի խումբ հայտնել է, որ Pfizer-BioNTech վակցինայի երկու ներարկումների արդյունավետությունը կես տարի անց սկսում է նվազել, ուստի ապահովության համար նպատակահարմար է մարդկանց տրամադրել նաև երրորդ դեղաչափը:
Բժիշկները ենթադրում են, որ երրորդ դեղաչափը կվերականգնի հակամարմինների այն առավելագույն քանակը, որը ժամանակին ձևավորվել է երկրորդ ներարկումից հետո:
Իսրայելի 9 միլիոն 300 հազար բնակիչներից 2 միլիոնն արդեն ստացել է կորոնավիրուսի դեմ երրորդ դեղաչափը:
Երրորդ ներարկման ծրագիրն են կազմել նաև Միացյալ Նահանգները, Կանադան և Եվրոպական միության երկրները:
Առողջապահության համաշխարհային կազմակերպությունը զարգացած երկրներին հորդորում է սառեցնել այդ ծրագիը և երրորդ ներարկման համար նախատեսված վակցինան տրամադրել աղքատ այն երկրներին, որտեղ մարդիկ դեռ չեն ստացել նույնիսկ առաջին դեղաչափը:
