Պաշտոնական Թեհրանը կոշտ քննադատության է ենթարկել Միացյալ Նահանգների կողմից Իրանի քաղաքացիների դեմ սահմանված նոր պատժամիջոցները։ Դրանց թիրախում են հայտնվել ԱՄՆ տարածքում բնակվող իրանցի լրագրող Մասիհ Ալինեժադի առևանգման փորձին առնչություն ունեցող հատուկ ծառայությունների չորս աշխատակիցներ՝ Ալիռեզա Ֆարահանին, Մահմուդ Խազեինը, Քիյա Սադեղին և Օմիդ Նուրին։
«ԱՄՆ ֆինանսների նախարարությունը արգելել է որևէ տեսակի դրամական փոխանցումները պատժամիջոցների ենթարկված անձանց և ԱՄՆ քաղաքացիների միջև, Միացյալ Նահանգներում նրանց պատկանող ունեցվածքի հայտնաբերման դեպքում այն արգելանքի տակ կհայտնվի», – հաղորդում է Reuters գործակալությունը։
Ընդդիմադիր հայացքներով հայտնի վտարանդի լրագրող Մասիհ Ալինեժադի առևանգման փորձի մասին հայտնի էր դարձել ամռանը, որից հետո ամերիկյան հատուկ ծառայությունները լրագրողուհուն ոստիկանական ուղեկցություն էին տրամադրել։ Պաշտոնական Թեհրանը, սակայն, Ալինեժադի ձախողված առևանգման մասին պատմությունը կեղծիք է անվանում՝ այն «հոլիվուդյան սցենար» որակելով։
«Վաշինգտոնը պետք է հասկանա, որ հարկավոր է զերծ մնալ նորանոր պատժամիջոցների կիրառումից և հարգանքով վերաբերվել Իրանին», – Twitter-ում գրել է Իրանի արտգործնախարարության պաշտոնական ներկայացուցիչ Սաեդ Խաթիբզադեն։
