Կարմիր խաչի միջազգային կոմիտեն ակտիվորեն համագործակցում է Լեռնային Ղարաբաղում տեղակայված ռուսաստանցի խաղաղապահների հետ, ԻՏԱՌ-ՏԱՍՍ-ի թղթակցի հետ զրույցում ասել է Կարմիր խաչի՝ Ռուսաստանի, Բելառոսի և Մոլդովայի գծով տարածաշրջանային պատվիրակության ղեկավար Իխտիյար Ասլանովը։
Նրա խոսքով` կազմակերպության՝ Լեռնային Ղարաբաղում ծավալած գործունեության հիմնական ուղղությունը զոհված զինծառայողների մարմինների որոնումն է։ «Բացի այդ կազմակերպությունը անդրադառնում է մի շարք այլ մարդասիրական խնդիրների լուծմանը, մասնավորաբար այն ենթակառուցվածքների զարգացմանը, որոնք տուժել են վերջին սրացման ընթացքում», – նշել է Ասլանովը։
Կարմիր խաչի ներկայացուցիչը նաև ասել է, որ Ադրբեջանն ու Հայաստանը հնարավորություն են ընձեռել Կարմիր խաչի միջազգային կոմիտեի ներկայացուցիչներին մուտք գործել սահմանամերձ շրջաններ։ «Մենք այն եզակի միջազգային կազմակերպություններից ենք, որ ներկայացված ենք այդ տարածաշրջանում», – նշել է Ասլանովը։
