«Թալիբան»-ի զինյալները օդ են կրակել՝ Քաբուլում Պակիստանի դեսպանատան մոտ կազմակերպված ցույցը ցրելու համար։ Ըստ ականատեսների, զինյալները նաև ձերբակալել են ակցիան լուսաբանող լրագրողներին։
Բողոքի ցույցին ներկա է եղել մոտ 70 տասնյակ մարդ, որոնք դատապարտել են Պակիստանի միջամտությունը Աֆղանստանի ներքին գործերին, այդ թվում՝ Իսլամաբադի ենթադրյալ աջակցությունը թալիբներին՝ Փանջշերի հովտում ընդվզման ալիքը ճնշելու համար։
Ձերբակալված լրագրողներից մեկը, ով ավելի ուշ ազատ է արձակվել, անանուն մնալու պայմանով Associated Press-ին պատմել է՝ թալիբները ստիպել են նրան քիթը քսել գետնին և ներողություն խնդրել՝ բողոքի ակցիան լուսաբանելու համար։
Արևմտյան երկրները բազմիցս են հայտարարել, որ հետևելու են՝ ինչպես են թալիբները պաշտպանում Աֆղանստանի քաղաքացիների իրավունքները և ազատությունները, և ըստ այդմ էլ ձևավորելու են իրենց ապագա վերաբերմունքը նրանց կառավարության նկատմամբ։
