Պնդումներն այն մասին, թե երրորդ ուժեր են գտնվում ադրբեջանա-իրանական սահմանի մոտ, անհիմն են, հայտարարել է Ադրբեջանի արտգործնախարարության մամուլի ծառայության ղեկավար Լեյլա Աբդուլաևան՝ մեկնաբանելով Իրանի ԱԳ նախարարի հնչեցրած մեղադրանքները:
«Մեզ համար անընդունելի են հայտարարությունները ադրբեջանա-իրանական սահմանի մոտ որևէ երրորդ ուժի առկայության, այդ ուժերի սադրանքների փորձերի մասին, քանի որ այդ հայտարարություններն անհիմն են», – ասել է Աբդուլաևան։
«Ընդհանրապես, Ադրբեջանի տարածքում ցանկացած ուժերի, այդ թվում՝ ահաբեկչական ուժերի առկայությունը, որոնք կարող են վտանգ ներկայացնել մեր պետության և հարևան երկրների համար, չի կարող քննարկման առարկա լինել: Ցավոք, նույնիսկ 44-օրյա Հայրենական պատերազմի ընթացքում որոշ կողմեր նման անհիմն հայտարարություններ հնչեցրին: Մենք այն ժամանակ հայտարարեցինք և հիմա էլ կրկնում ենք, որ նման պնդումներն անհիմն են, և մինչ այժմ ոչ մի համապատասխան ապացույց չի ներկայացվել ադրբեջանական կողմին», – պնդել է Ադրբեջանի արտաքին քաղաքական գերատեսչության խոսնակը:
