Եվրահանձնաժողովի ղեկավար Ուրսուլա ֆոն դեր Լայենը, մեկնաբանելով «Պանդորայի դոսյեում» տեղ գտած բացահայտումները, դատապարտել է հարկերից խուսափելը առհասարակ:
«Մենք Եվրոպական միությունում ունենք հարկային թափանցիկության ամենաբարձր չափանիշներից մեկն աշխարհում: Բայց ինչպես տեսնում ենք՝ դա բավարար չէ, լրացուցիչ աշխատանք է անհրաժեշտ», – հայտարարել է ֆոն դեր Լայենը։
Նրա խոսքով՝ այդ քայլերից մեկը պետք է լինի «հարկային դրախտի» սև ցուցակը, որը կհաստատվի եվրոպական երկրների ֆինանսների նախարարների կողմից:
Մինչդեռ քաղաքական գործիչները, գործարարները և այլ ազդեցիկ մարդիկ, որոնց անունները նշված են «Պանդորայի դոսյեում», փորձում են իրենց տարանջատել հարկերից խուսափելու մեղադրանքներից:
Ռուսաստանի նախագահ Վլադիմիր Պուտինը որպես անմիջական մասնակից չի նշվում, սակայն մատնանշվում են մարդիկ, ովքեր ենթադրաբար կապված են նրա շրջապատի հետ: Կրեմլի խոսնակ Դմիտրի Պեսկովը, սակայն, բացահայտումներն անվանել է «չհիմնավորված մեղադրանքներ»: «Անհասկանալի է, թե ինչպես կարող եք վստահել այս տեղեկատվությանը», – հայտարարել է նա։
