«Ադրբեջանական ավիաուղիներ»-ը (AZAL) հայտարարել է, որ հոկտեմբերի 6-ից սկսել է օգտագործել Հայաստանի օդային տարածքը Բաքու-Նախիջևան-Բաքու ներքին չվերթներն իրականացնելու համար, հաղորդում է «Թրենդ» լրատվական գործակալությունը:
«Այս քայլը ցույց է տալիս տարածաշրջանում տրանսպորտային հաղորդակցություններն ապաշրջափակելու Ադրբեջանի վճռական պատրաստակամությունը, որը համապատասխանում է սահմանամերձ բոլոր երկրների շահերին», – ասված է հաղորդագրությունում:
Նշվում է, որ Բաքու-Նախիջևան-Բաքու չվերթի երթուղու փոփոխությունը կհանգեցնի այս ուղղությամբ թռիչքի ժամանակի կրճատմանը, ինչպես նաև թռիչքի ընթացքում վառելիքի սպառման նվազմանը:
Այսպիսով, այսուհետ տվյալ թռիչքը կատարելիս AZAL- կարող է օգտվել առկա բոլոր օդային միջանցքներից, այդ թվում `Հայաստանի և Իրանի տարածքներով անցնողներից, նշված է հաղորդագրությունում։
Հայկական կողմն այս կապակցությամբ առայժմ որևէ բան չի հաղորդել։
Ադրբեջանն ու Հայաստանը պաշտոնապես չեն փակել իրենց օդային տարածքը երկու երկրների ավիաընկերությունների համար: Այդուհանդերձ, 1990-ականների սկզբից, Լեռնային Ղարաբաղի հակամարտության պատճառով, ադրբեջանական ավիափոխադրողները չեն օգտագործել Հայաստանի օդային միջանցքները, իսկ հայկականները՝ Ադրբեջանի օդային տարածքը:
