![Ադրբեջանում պահվող հայ գերիների վերադարձը հրատապ է․Արման Թաթոյանը՝ Վատիկանի պետքարտուղարին](/wp-content/uploads/sites/8/2021/10/1633514707_Ադրբեջանում-պահվող-հայ-գերիների-վերադարձը-հրատապ-է․Արման-Թաթոյանը՝-Վատիկանի-պետքարտուղարին.jpg)
Ադրբեջանում պահվող հայ գերիների վերադարձը հրատապ է, Վատիկանում հայտարարել է Հայաստանի մարդու իրավունքների պաշտպանը։
Ընդգծելով, որ կոպիտ ոտնահարված են միջազգային պահանջները` Արման Թաթոյանը, Վատիկանի պետքարտուղար կարդինալ Պիետրո Պարոլիի հետ հանդիպմանը, շեշտել է՝ հայ գերիները պահվում են ռազմաքաղաքական սակարկությունների նպատակով։
Պատերազմից հետո Ադրբեջանը 108 գերի է վերադարձրել՝ զինծառայողներ և քաղաքացիական անձինք։ Հայկական կողմի ոչ պաշտոնական տվյալներով՝ այսօր Բաքվի բանտերում մի քանի տասնյակ հայ գերիներ են պահվում։ Բաքուն բազմիցս հայտարարել է, թե վերադարձրել է բոլոր գերիներին՝ ադրբեջանական բանտերում պահվող քաղաքացիներին անվանելով «ահաբեկիչներ»։
Հայաստանի օմբուդսմենը Վատիկանի պետքարտուղարին է փոխանցել 44-օրյա պատերազմի օրերին ու դրանից հետո հայ գերիների նկատմամբ ադրբեջանական խոշտանգումների և դաժան վերաբերմունքի վերաբերյալ իր զեկույցները, հիմնավոր ապացույցներ։
Մայիսի 12-ից սկսած ադրբեջանական զինուժը առնվազն երեք ուղղություններով ներխուժել է Հայաստանի Հանրապետության տարածք և փաստացի ամրացել մի քանի կիլոմետր խորության վրա։ Իրավիճակը պարբերաբար սրվում է, սահմանին բախումներ են լինում։
Անդրադառնալով պատերազմից հետո ադրբեջանական զինծառայողների անօրինական տեղակայումներին՝ օմբուդսմենն ընդգծել է՝ վտանգվել է մարդկանց կյանքն ու առողջությունը։
Թաթոյանը Իտալիայում է Ամենայն Հայոց կաթողիկոս Գարեգին Երկրորդի գլխավորած պատվիրակության կազմում։ Կաթողիկոսն Իտալիայում է՝ մասնակցելու Սանտ Էջիդիոյի համայնքի կողմից կազմակերպված «Մարդիկ որպես եղբայրներ և երկրի ապագան․ կրոններն ու մշակույթները երկխոսության մեջ» խորագրով համաժողովին և միջեկեղեցական աղոթքին։