Հայաստանի քրեակատարողական հիմնարկներում գտնվում է Իրանի 35 քաղաքացի, հայտնում է Հայաստանի գլխավոր դատախազությունը՝ նշելով, որ նրանք հիմնականում «Արմավիր» քրեակատարողականում են։
Ըստ դատախազության՝10-ի նկատմամբ առկա է օրինական ուժի մեջ մտած դատավճիռ, 7-ի վերաբերյալ թեև կա կայացված դատավճիռ, սակայն դրանք գտնվում են բողոքարկման փուլում, իսկ 18 անձ նախնական կալանքի տակ է:
Հետագա պատիժը հայրենիքում կրելու նպատակով 2020-2021թթ. ընթացքում Հայաստանն Իրանին է հանձնել այդ երկրի 47 քաղաքացու:
Հայաստանում գտնվող Իրանի գլխավոր դատախազ Մոհամմադ Ջաֆար Մոնթազերին Հայաստան իր աշխատանքային այցն ավարտել է «Արմավիր» ՔԿՀ այցելությամբ, ծանոթացել պահվող անձանց կեցության պայմաններին, Իրանի քաղաքացիների առողջության պահպանման և սպասարկման համար քրեակատարողական հիմնարկում առկա կարողություններին:
Մոհամմադ Ջաֆար Մոնթազերին եռօրյա աշխատանքային այցով էր Հայաստանում՝ գլխավոր դատախազ Արթուր Դավթյանի հրավերով։ Մոնթազերին հանդիպել է նաև վարչապետ Նիկոլ Փաշինյանի հետ։
