ՄԱԿ-ի փախստականների հարցերով գործակալությունը խորը մտահոգություն է հայտնել ապօրինի միգրանտների արտաքսման մասին Լեհաստանի խորհրդարանի ընդունած օրենքի կապակցությամբ։ Կառույցի գնահատմամբ՝ լեհական օրենքը խարխլում է ապաստանի հիմնարար իրավունքի մասին միջազգային և եվրոպական օրենսդրությունը։
«Լեհաստանի կողմից ընդունված օրենքը, որն իբր պատասխան է Եվրամիության և Բելառուսի սահմաններին տիրող իրավիճակին, հակասում է միջազգային իրավունքին ու Եվրամիության օրենսդրությունը, և այն է՛լ ավելի կխորացնի ստիպված փախուստի դիմած մարդկանց տառապանքները», – հայտարարել է ՄԱԿ-ի Փախստականների հարցերով գերագույն հանձնակատարի գրասենյակի ներկայացուցիչ Քրիսթին Գոյերը։
Նա վկայակոչել է Փախստականների կարգավիճակի մասին կոնվենցիան, որում հստակ նշվում է, որ ապաստան փնտրող մարդիկ չպետք է պատժի ենթարկվեն սահմանը ապօրինի հատելու համար։ «Սահմանի ապօրինի հատումը պետությանը չի ազատում ապաստանի իրավունքի վերաբերյալ միջազգային պարտավորություններից», – շեշտել է ՄԱԿ-ի ներկայացուցիչը։
Լեհական խորհրդարանի ընդունած օրենքի համաձայն՝ սահմանն ապօրինի հատած միգրանտները կձերբակալվեն և կարտաքսվեն երկրից։ Նորամուծությունը լեհական իշխանություններին հնարավորություն է ընձեռում նաև չուսումնասիրել ապաստան տրամադրելու մասին միջնորդությունները, որոնք ստացվել են սահմանի ապօրինի հատումից հետո, եթե դիմումատուն չի ժամանել մի վայրից, որտեղ նրա կյանքին կամ ազատությանը վտանգ է սպառնում։
Վերջին շաբաթներին Վարշավան հազարավոր զինվորականների է տեղակայել երկրի սահմաններին, փշալարեր անցկացրել և արտակարգ դրություն մտցրել՝ արգելելով լրագրողների ու հումանիտար կազմակերպությունների մուտքը 400 կիլոմետր երկայնքով սահման։
Օգոստոսից հազարավոր միգրանտներ՝ հիմնականում Մերձավոր Արևելքից և Աֆրիկայից, փորձում են Բելառուսի կողմից հատել լեհական սահմանը։ Թե ինչպես են ապօրինի միգրանտները հայտնվում Բելառուսի տարածքում, պաշտոնական Մինսկը չի պարզաբանում։
