Սերբիան բացատրություններ կպահանջի եվրոպական կառույցներից՝ Ալբանիայի և Կոսովոյի միավորման վերաբերյալ հնչող հայտարարությունների առթիվ։ Այդ մասին այսօր հեռարձակված ելույթում հայտարարել է Սերբիայի նախագահ Ալեքսանդր Վուչիչը՝ մեկնաբանելով Կոսովոյի վարչապետ Ալբին Կուրտիի վերջին հայտարարությունները։
«Ես նամակով կդիմեմ բոլոր պետությունների ղեկավարներին՝ խնդրելով բացատրություն տալ Կուրտիի հայտարարությունների առթիվ։ Դրանցում նա ուղղակիորեն խոսել է Կոսովոն և Ալբանիան մեկ միասնական պետության կազմում տեսնելու ցանկության մասին։ Եվրոպական որևէ կառույց, սակայն, այդ թվում՝ Եվրոպական հանձնաժողովն ու Եվրախորհրդարանը, այդ հայտարարություններին այդպես էլ չեն արձագանքել», – շեշտել է Վուչիչը՝ հավելելով․ – «Ինչո՞ւ է ալբանացիներին ամեն ինչ թույլատրելի, իսկ սերբերին՝ ոչ»։
