Կորոնավիրուսի նոր շտամով՝ «Օմիկրոնով» պայմանավորված Հայաստանը ևս ժամանակավորապես կսահմանափակի Հարավային Աֆրիկայի Հանրապետությունից, Բոտսվանայից, Լեսոթոյից, Նամիբիայից, Զիմբաբվեից, Մոզամբիկից, Մադագասկարից և Տանզանիայից քաղաքացիների մուտքը երկիր՝ հետևելով Առողջապահության համաշխարհային կազմակերպության (ԱՀԿ) հաղորդագրություններին։
Առողջապահության նախարար Անահիտ Ավանեսյանն այսօր ասուլիսի ժամանակ տեղեկացրեց, որ այսօր միջգերատեսչական հանձնաժողովի նիստ կգումարվի, իսկ օրվա ավարտին արդեն կունենան սահմանափակումների նոր կազմը։
«Բացի սրանից կլինեն նաև ևս որոշակի սահմանափակումներ, որոնք մինչև օրվա վերջ ձեզ ևս հայտնի կլինեն», – ասաց նախարարը։
ԱՀԿ օրերս ահազանգեց կորոնավիրուսային հիվանդության հարուցչի նոր ենթատեսակի` «Օմիկրոնի» մասին` սահմանելով այն որպես անհանգստություն առաջացնող։
Կորոնավիրուսային հիվանդության նոր շտամն ունի շուրջ 50 մուտացիա, որից 30-ը` սպայկային սպիտակուցում, առաջին անգամ արձանագրվել է Հարավային Աֆրիկայի Հանրապետությունում: «Օմիկրոն» շտամով պայմանավորված` դեպքեր են արձանագրվել նաև Բոտսվանայի Հանրապետությունում, Հոնկոնգում, Բելգիայում, Իսրայելում: Գիտնականները դեռ չեն պարզել նոր շտամի վտանգավորության աստիճանը։
Մի շարք երկրներ արդեն ձեռնարկել են սահմանափակող միջոցառումներ, այդ թվում` սահմանել են մուտքի արգելք աֆրիկյան մի շարք երկրներից, ասված է հաղորդագրությունում:
