Վրաստանի նախկին նախագահ Միխեիլ Սաակաշվիլին Ուկրաինայի տարածքից Վրաստան է հասել Ուկրաինայի ուժային կառույցների նախկին բարձրաստիճան պաշտոնյայի օգնությամբ, այս մասին հայտարարել է գործը քննող դատախազ Լևան Վեպխաձեն։ Ուկրաինացի նախկին պաշտոնյայի անունը նա չի հայտնել։
«Մանրամասն հստակեցվել է, այդ թվում` այն, թե ով է նրան օգնել Ուկրաինայի տարածքում. նա նախկին կառավարության ուժային կառույցներից նախկին բարձրաստիճան պաշտոնյա է, որն օգնել է Միխեիլ Սաակաշվիլիին սահմանի ապօրինի հատման հարցում»,- լրագրողներին հայտնել է դատախազ Վեպխաձեն։
Թբիլիսիի քաղաքային դատարանում այսօր մեկնարկել է Վրաստանի երրորդ նախագահի դեմ հարուցված՝ սահմանի ապօրինի հատման գործով լսումները։ Քաղաքական գործիչը, որը 50-օրյա հացադուլից հետո բուժման կուրս է անցնում Գորի քաղաքի զինվորական հոսպիտալում, հրաժարվել է ներկա գտնվել դատական նիստին՝ պատճառաբանելով առողջական վատ վիճակը։
Սաակաշվիլին 8-ամյա բացակայությունից հետո գաղտնի Վրաստան է ժամանել սեպտեմբերի 29-ին։ Հոկտեմբերի 1-ին նա արդեն ձերբակալվել է Թբիլիսիում։ Ուկրաինայի պետական սահմանապահ ծառայությունը ծառայողական ստուգում է անցկացնում Սաակաշվիլիի կողմից ուկրաինական սահմանի հատման գործով։ Գերատեսչությունը շաբաթներ առաջ հայտարարել է, որ մի խումբ աշխատակիցներ արդեն պաշտոնանկ են արվել։
