Հունվարից Ադրբեջանի կառավարությունը գործարկում է Բաքու-Շուշի, Բաքու-Աղդամ կանոնավոր ուղևորափոխադրումներ։ Այս մասին հայտնում է «Թուրան» գործակալությունը՝ վկայակոչելով Ցամաքային տրանսպորտի պետական գործակալության հայտարարությունը։
Ուղևորափոխադրումները կիրականացվեն ավտոբուսներով, նախնական փուլում՝ շաբաթական երկու անգամ, հետագայում ավելի շատ, նշում է լրատվամիջոցը։
Ավելի վաղ Ադրբեջանի կառավարությունը հայտարարել էր դեպի Շուշի երկաթգծի կառուցման պլանների մասին։ «Ադրբեջանի երկաթուղիներ» ընկերության ղեկավար Ջավիդ Ղուրբանովի խոսքով՝ այդ նախագիծը մշակվում է թուրքական Kaylon ընկերության հետ համատեղ։
44-օրյա պատերազմից հետո Բաքվի վերահսկողության տակ անցած տարածքներում Ադրբեջանի կառավարությունը կառուցել է Ֆիզուլիի օդանավակայանը։ Ըստ այդ երկրի պաշտոնական աղբյուրների, առաջիկայում միջազգային օդանավակայաններ կկառուցվեն նաև Զանգիլանի և Լաչինի շրջաններում։
Մասնավորապես, Զանգելանի օդանավակայանը Ադրբեջանի իշխանությունները ներկայացնում են որպես տրանսպորտային հանգույց, որը Հայաստանի հարավով «նախատեսված» ցամաքային ճանապարհով Ադրբեջանի հիմնական մասը կմիացնի Նախիջևանի հետ։
