Տարվա ավարտի հետ Գերմանիայում միջուկային էներգիայից հրաժարվելը նոր փուլ է մտնում՝ այսօր ցանցից կանջատվեն երեք ատոմակայաններ:
Գերմանիայում ատոմակայանների շահագործման արգելքն ընդունվել է 2011 թվականին Ճապոնիայի «Ֆուկուսիմա» ատոմակայանում տեղի ունեցած վթարից հետո։ Բունդեսթագում քվեարկության ժամանակ այս նախաձեռնությունը պաշտպանել է 600 պատգամավորներից 513-ը։ Ամենահին ռեակտորները փակվել են անմիջապես, և որոշվել է փուլ առ փուլ փակել մնացած ինը ռեակտորները: Բավարիայում, Ներքին Սաքսոնիայում և Շլեզվիգ-Հոլշտայնում տեղակայված երեք ատոմակայաններից հետո, որոնք այս տարի կդադարեն էլեկտրաէներգիա արտադրել, մնացած երեքը կփակվեն մինչև հաջորդ տարվա վերջ։
Միևնույն ժամանակ, ատոմակայանների փակման հետ կապված աշխատանքները կշարունակվեն ևս մի քանի տարի, քանի որ դրանց ապամոնտաժումը շատ բարդ և երկարատև ընթացակարգ է։
Գերմանիան նախատեսում է գնալով ավելի շատ անցնել էներգիայի վերականգնվող աղբյուրներին: Ենթադրվում է, որ մինչև 2030 թվականը երկրում էլեկտրաէներգիայի 80 տոկոսը կարտադրվի հողմային տուրբինների, արևային մարտկոցների կամ կենսագազի կայանների կողմից։
