Ֆինլանդիայի նախագահն ու վարչապետը իրենց ամանորյա ուղերձներում շեշտել են, որ Ֆինլանդիան իրեն իրավունք է վերապահում ցանկացած պահի դիմելու ՆԱՏՕ-ին՝ Հյուսիսատլանտյան դաշինքին անդամակցելու խնդրանքով։
Ֆինլանդիայի նախագահ Սաուլի Նիինիստոն ասել է. «Իր ճանապարհը ազատ ընտրելու Ֆինլանդիայի իրավունքը ներառում է նաև ՆԱՏՕ-ին անդամակցելու հնարավորություն, եթե մենք ինքներս նման ընտրություն կատարենք»։
Վարչապետ Սանա Մարին հայտարարել է, որ յուրաքանչյուր երկիր իրավունք ունի ընտրելու անվտանգության իր քաղաքականությունը։ «Մենք պատմությունից դասեր ենք քաղել և թույլ չենք տա զրկելու ընտրության ազատությունից»,- ասել է Ֆինլանդիայի վարչապետը։
Ռուսաստանի ԱԳ նախարարության մամուլի խոսնակը դեկտեմբերի վերջերին տեղի ունեցած ճեպազրույցում ասել էր, թե Ֆինլանդիայի ու Շվեդիայի անդամակցումը ՆԱՏՕ-ին ռազմական ու քաղաքական լուրջ հետևանքներ կունենա, ինչը կպահանջի ռուսական կողմի համարժեք պատասխանը։
