Ռուսաստանի նախագահի մամլո ծառայությունը փոխանցել է, որ վաղը՝ հունվարի 19-ին, Կրեմլում նախատեսված են Ռուսաստանի Դաշնության և Իրանի Իսլամական Հանրապետության նախագահներ Վլադիմիր Պուտինի և Էբրահիմ Ռաիսիի բանակցությունները:
Կողմերը քննարկելու են երկկողմ հարաբերությունների, այդ թվում՝ առևտրի և տնտեսության բնագավառներում համատեղ նախագծերի իրականացումը:
Նախագահները կանդրադառնան նաև միջազգային և տարածաշրջանային հրատապ խնդիրներին:
Կրեմլի մամլո ծառայությունը նշում է, որ Պուտինը և Ռաիսին կքննարկեն Իրանի միջուկային ծրագրի թեման:
Հաջորդ օրը՝ հունվարի 20-ին, Իրանի նախագահը ելույթով հանդես կգա Ռուսաստանի խորհրդարանի ստորին պալատ Պետական դումայում:
Ռաիսին նաև կայցելի Մոսկվայում Ռուսաստանի մահմեդականների հոգևոր վարչություն և կհանդիպի ռուսաստանյան տարբեր շրջաններից կրոնական առաջնորդների հետ:
Ռաիսին առաջին անգամ է այցելում Ռուսաստան: Իրանի նախագահիպաշտոնը 2021 թվականի օգոստոսի 5-ին ստանձնելուց հետո նա մի քանի անգամ հեռախոսով զրուցել է Ռուսաստանի նախագահ Պուրտինի հետ:
