ՄԱԿ-ի գլխավոր քարտուղար Անտոնիո Գուտերեշը հեռավար ձևաչափով դիմելով Դավոսի ֆորումին, կոչ է արել 2022 թվականը դարձնել վերականգման տարի:
Նա ընդգծել է համագործակցության անհրաժեշտությունը երեք բնագավառներում՝ վակցինաների արդար մատակարարում, համաշխարհային ֆինանսական համակարգի կայունացում և զարգացող երկրներում կլիմայի պաշտպանությանն ուղղված քայլեր:
«Աշխարհը դուրս է գալիս բոլորին կաթվածահար արած տնտեսական ճգնաժամից, բայց վերականգնումը շատ փխրուն է և անկայուն շարունակվող համավարակի, աշխատանքի շուկայում առկա մարտահրավերների, գլոբալ մակարդակում մատակարարման ընդհատումների, ֆինանսական պարտքերի, էլ չասած, աշխարհքաղաքական պառակտումների պայմաններում», – ասել է Գուտերեշը:
Նա կոչ է արել արդար եղանակով բաժանել կորոնավիրուսի դեմ վակցինայի պաշարները, կայունացնել ֆինանսական համակարգը, վերանայել պարտքերը և կոնկրետ գործողություններով բարելավել կլիման:
Համաշխարհային տնտեսական համաժողովը տարեկան միջոցառում է, որը հունվարին գումարվում է Շվեյցարիայում՝ Դավոս առողջարանային ավանում:
Հաշվի առնելով կորոնավիրուսի հանգամանքը՝ այս տարվա հունվարին մասնակիցներն առցանց ձևաչափով հանդես կգան ուղերձներով, իսկ ֆորումի առկա գումարումը տեղի կունենա ամռանը:
