Բրիտանիայի վարչապետ Բորիս Ջոնսոնն այսօր պետք է Ռուսաստանի նախագահ Վլադիմիր Պուտինի հետ քննարկի Ուկրաինայի շուրջ ստեղծված լարված իրավիճակը:
Բրիտանիայի կառավարության ղեկավարն ավելի վաղ հայտնել է, որ ցանկանում է նպաստել ռուս-ուկրաինական սահմանին հետզհետե սրվող ճգնաժամի թուլացմանը:
Նա, մասնավորապես, մտադիր է Պուտինին ասել, որ «ցանկացած ներխուժում Ուկրաինայի տարածք կդառնա բացարձակ աղետ աշխարհի ու նախ և առաջ Ռուսաստանի համար»: Ջոնսոնը մտադիր է Պուտինին կոչ անել «հեռու մնալ Ուկրաինայից»:
Այսօրվա զրույցից հետո Ջոնսոնը վաղը՝ փետրվարի 1-ին, մեկնելու է Կիև, որտեղ նախատեսված է հանդիպում Ուկրաինայի նախագահ Վլադիմիր Զելենսկու հետ: Այցի ընթացքում Բրիտանիայի վարչապետին ուղեկցելու է արտգործնախարար Լիզ Թրասսը:
Վերջին ժամանակաշրջանում արևմտյան երկրներում նշում են, որ Ռուսաստանը կարող է հարձակվել Ուկրաինայի վրա:
Կրեմլի խոսնակ Դմիտրի Պեսկովն այդ կապակցությամբ ասել է, թե Ուկրաինան և արևմտյան երկրները կարող են դիմել սադրանքների, որոնք կհանգեցնեն ռազմական գործողությունների, ինչից հետո Ուկրաինան կարող է փորձել ռազմական եղանակով լուծել Դոնբասի հիմնահարցերը: Պեսկովի փոխանցմամբ, «դա կունենա աղետալի հետևանքներ»:
Մոսկվան հավաստիացնում է, որ չունի Ուկրաինա ներխուժելու որևէ մտադրություն և պնդում է, որ այդ երկրի սահմանների մոտ գտնվող շուրջ 100 հազարի հասնող բանակը որևէ երկրի համար սպառնալիք չի հանդիսանում:
