Պեկինում այսօր մեկնարկում են ձմեռային Օլիմպիական խաղերը։ Համաճարակի պատճառով, սակայն, որոշ մարզիկներ հեռացվում են խաղերից դեռ դրանք չսկսած:
Չինաստանի իշխանությունները, մտավախություն ունենալով երկրում կորոնավիրուսի տարածումից, շատ խիստ միջոցներ են ձեռնարկել՝ բոլոր մարզիկները շարժվում են միայն մի քանի կետերի շրջանակներում, որոնք ներառում են օդանավակայաններ, մրցումների և մարզումների վայրեր և օլիմպիական գյուղեր:
Օտարերկրյա երկրպագուներին թույլ չեն տա ներկա լինել խաղերին, տոմսեր չեն վաճառվում։ Դրանք կբաշխվեն մարդկանց որոշակի խմբերի միջև, օրինակ՝ Օլիմպիական խաղերի հովանավորների ներկայացուցիչների։
Չնայած աննախադեպ միջոցառումներին՝ Չինաստանում աճում է կորոնավիրուսով վարակվածների թիվը։ Այսպես, Պեկինում դեպքերի թիվը հասել է առավելագույնին վերջին 18 ամիսների ընթացքում։