Միացյալ Նահանգները Ճապոնիային խնդրում է քննարկել Ռուսաստանի նկատմամբ պատժամիջոցների հարցն, այն դեպքում, եթե Ռուսաստանը հարձակվի Ուկրաինայի վրա: Այդ մասին՝ հղում անելով մի անանուն դիվանագիտական աղբյուրի, հայտնել է Kyodo News ճապոնական լրատվական գործակալությունը:
Kyodo News-ը նշում է, որ դա բավական բարդ խնդիր է Ճապոնիայի համար, քանի որ պատժամիջոցների սահմանումը բացասական կազդի ռուս-ճապոնական հարաբերությունների և, մասնավորապես, խաղաղություն կնքելու պայմանագրի շուրջ բանակցությունների վրա:
Ենթադրվում է, որ ԱՄՆ նախագահ Ջո Բայդենը մայիսի երկրորդ կեսին կայցելի Տոկիո: Ամերիկա-ճապոնական բանակցություններում առանցքային թեմաներից մեկը կլինի Ճապոնիայի՝ իբրև ԱՄՆ-ի դաշնակցի և «Մեծ յոթնյակի» անդամի դիրքորոշումը Ռուսաստանի դեմ պատժամիջոցների հարցում:
Ճապոնիայի արտգործնախարար Յոսիմասա Խայասին այս շաբաթվա ընթացքում հրաժարվել է հստակ ներկայացնել Տոկիոյի դիրքորոշումը, նշելով, որ տվյալ պահին այդ հարցը սոսկ տեսական բնույթ ունի:
Հունվարի 21-ին վարչապետ Կիսիդան և նախագահ Բայդենը տեսակապով քննարկել են մի շարք հարցեր: Կողմերը նշել են, որ «անհրաժեշտ է սերտ համագործակցել և ջանքեր գործադրել Ուկրաինայի վրա Ռուսաստանի հնարավոր հարձակումը կանխելու համար»:
