Ուկրաինայի նախագահ Վլադիմիր Զելենսկին հեռախոսով զրուցել է Եվրոպական խորհրդի նախագահ Շարլ Միշելի հետ:
Զելենսկին Թվիթերում հայտնել է, որ զրույցի ընթացքում քննարկվել է Ուկրաինայի շուրջ ստեղծված լարված իրավիճակը և «բոլոր գործող ձևաչափերի շրջանակներում դրա թուլացման հնարավորությունները»:
«Գործադրում ենք դիվանագիտական ջանքեր, համագործակցում ենք բոլոր հնարավոր ուղղություններով խաղաղությունը վերականգնելու համար: Շնորհակալ եմ Եվրոպական խորհրդին Ուկրաինային հետևողականորեն աջակցելու համար»,- գրել է Զելենսկին:
Ռուսաստանն Ուկրաինայի սահմանների մոտ տեղակայել է ավելի քան 100 հազար զինծառայողներ: Բացի այդ, մոտ 30 հազար զինծառայողներ էլ գտնվում են Ուկրաինայի հարևան Բելառուսում:
Արևմուտքը ենթադրում է, որ Ռուսաստանը կարող է հարձակվել Ուկրաինայի վրա: Մոսկվան հավաստիացնում է, որ նման մտադրություն չունի:
