Միացյալ Նահանգների նախագահը հայտարարել է, որ ամերիկյան զորքեր ուղարկելը Ուկրաինա կարող է հանգեցնել համաշխարհային պատերազմի։
Ջո Բայդենը երեկ կոչ է արել Ամերիկայի քաղաքացիներին՝ անհապաղ լքել Ուկրաինան և նախազգուշացրել է Մոսկվայի հետ հնարավոր մեծ հակամարտության մասին:
«Ամերիկայի քաղաքացիները պետք է հեռանան, պետք է հեռանան հիմա», – ասել է Բայդենը NBC News-ին։
«Մենք գործ ունենք աշխարհի ամենամեծ բանակներից մեկի հետ։ Սա բոլորովին այլ իրավիճակ է, և ամեն ինչ կարող է շատ արագ փոխվել»,- ասել է նախագահը` նկատի ունենալով ՌԴ զինված ուժերին։
Բայդենը նաև հաստատել է, որ ոչ մի դեպքում զորք չի ուղարկի Ուկրաինա, նույնիսկ՝ ռուսների ներխուժման դեպքում ամերիկացիներին փրկելու համար։ «Դա կդառնա համաշխարհային պատերազմ: Երբ ամերիկացիներն ու ռուսները սկսեն կրակել միմյանց վրա, մենք կհայտնվենք բոլորովին այլ աշխարհում», – զգուշացրել է ԱՄՆ նախագահը։
