«Նորմանդյան քառյակի» ձևաչափով Գերմանիայի, Ֆրանսիայի, Ռուսաստանի և Ուկրաինայի ղեկավարների քաղաքական խորհրդականների երեկվա բանակցությունները Բեռլինում արդյունք չեն տվել:
Գերմանիայի կառավարության խոսնակ Ֆոլֆգանգ Բուխները բանակցություններից առաջ ասել է, թե բոլոր կողմերը տրամադրված են առաջխաղացում գրանցել: Սակայն քննարկումները, փաստորեն, ձախողվել են:
Ռուսաստանցի բանագնաց, նախագահ Վլադիմիր Պուտինի աշխատակազմի ղեկավարի տեղակալ Դմիտրի Կոզակն այսօր ասել է, թե Ուկրաինայի իրավիճակի կարգավորումը հայտնվել է փակուղում:
«Դժբախտաբար, այսօր փակուղի է: Ես համոզված եմ, որ միակ ճիշտ ուղին «Նորմանդյան» ձևաչափն է, անհրաժեշտ է, որ գործընկերները կենտրոնանան և ձևակերպեն կոնկրետ գաղափարներ, որոնք թույլ կտան ավարտել կոնֆլիկտը»,- ասել է Կոզակը:
Ուկրաինացի բանագնաց, նախագահ Վլադիմիր Զելենսկու աշխատակազմի ղեկավար Անդրեյ Երմակն, իր հերթին, պնդել է, որ առաջնահերթությունը կայուն հրադադարի հաստատումն է:
«Մենք համոզված ենք, որ պետք է այսօր խոսել անվտանգության երաշխիքների մասին, պետք չէ սպասել, առանց հրադադարի Ուկրաինայում չի լինի անվտանգության եվրոպական համակարգ»,- ասել է Երմակը:
Նորմանդյան ձևաչափը ստեղծվել է 2014 թվականի հունիսին Ֆրանսիայում, որտեղ Երկրորդ աշխարհամարտում Նորմանդիայում արևմտյան դաշնակիցների ափհանման գործողության 70-ամյակին նվիրված միջոցառումների շրջանակներում Ռուսաստանի, Գերմանիայի, Ֆրանսիայի և Ուկրաինայի լիդերները պայմանավորվել են բանակցել Ուկրաինայում ճգնաժամի կարգավորման շուրջ:
