Հայաստանը Կարմիր խաչի միջազգային կոմիտեի միջնորդությամբ Ադրբեջանին է վերադարձրել դիերի մասունքներ, հաղորդում են ադրբեջանական լրատվամիջոցները` հղում անելով Ռազմագերիների, պատանդների և անհետ կորածների հարցերով պետական հանձնաժողովի աշխատանքային խմբին:
Նշվում է, որ մասունքները դուրս են բերվել հիմնականում գրունտային և ստորերկրյա ջրերի վայրերից, ուստի «ԴՆԹ-ի նմուշներ ստանալը շատ դժվար է»։
«Վերջնական փուլում հստակ տեղեկատվություն կտրամադրվի այն մասին, թե քանի աճյուն կա այնտեղ», – ասել է աշխատանքային խմբի ղեկավարի տեղակալը:
Օրերս, երբ Ադրբեջանը վերադարձրեց հայ գերիների վերջին՝ ութ հոգանոց խմբին, այդ երկրի գերիների և անհետ կորածների հանձնաժողովը հայտարարեց, թե Բաքուն փոխարենը Հայաստանից տեղեկություն է ակնկալում 90-ականներին ադրբեջանցիների զանգվածային հուղարկավորումների վայրերի մասին։
Հայաստանի վարչապետ Նիկոլ Փաշինյանն էլ խորհրդարանում հայտարարեց, որ անցած տարվա ընթացքում Հայաստանը Ադրբեջանին է հանձնել ղարաբաղյան առաջին պատերազմի ժամանակ անհետ կորած 108 մարդու աճյուն։ Նա նաև նշեց, որ առաջիկա օրերին պատրաստվում են տեղափոխել ևս երկու դիերի աճյուններ։
