Ամերիկայի Միացյալ Նահանգների նախագահ Ջո Բայդենը փետրվարի 18-ին ուշ երեկոյան Սպիտակ տանը խոսել է Ուկրաինայի ճգնաժամի մասին:
Բայդենի փոխանցմամբ, «Պուտինն արդեն որոշել է հարձակվել Ուկրաինայի վրա»: Միաժամանակ նա ասել է, որ դեռ գոյություն ունի խնդիրը դիվանագիտական եղանակով լուծելու հնարավորություն:
Այդ առումով Բայդենն ասել է, որ փետրվարի 24-ին Եվրոպայում կհանդիպեն Միացյալ Նահանգների և Ռուսաստանի արտաքին գերատեսչությունների ղեկավարներ Էնթոնի Բլինքենը և Սերգեյ Լավրովը, «պայմանով, որ մինչ այդ պատերազմ չի սկսվի»:
Ջո Բայդենը հայտարարել է, որ Արևմուտքը և ՆԱՏՕ-ն միասնական են Ուկրաինայի հարցում:
Բայդենի խոսքով, եթե տեղի ունենա ագրեսիա՝ Արևմուտքը կսահմանի չափաանց կոշտ պատժամիջոցներ:
Բայդենն ասել է, որ պատերազմի դեպքում ամերիկյան ուժեր Ուկրաինա չեն մեկնի, սակայն Ամերիկան և ռազմական, և քաղաքական, և տնտեսական միջոցներով կշարունակի սատարել Ուկրաինային:
«Մենք Ռուսաստանին պատասխանատվության կկանչենք, եթե Ուկրաինան հարձակման ենթարկվի»,- ասել է Բայդենը:
Այսօր երեկոյան Դոնբասից տարհանում և Ռուսաստան են փոխադրում կանանց, երեխաներին և տարեցներին: Ռուս անջատականները հաղորդում են գնդակոծությունների և ականանետման մասին:
Ուկրաինական կողմը հայտարարում է, որ անջատականներն են կրակ բացում ուկրաինացիների վրա:
Ռուսաստանի Պետական դումայի խոսնակ Վյաչեսլավ Վոլոդինն ասել է, որ «Ռուսաստանը կպաշտպանի Դոնբասում բնակվող Ռուսաստանի քաղաքացիներին»:
