«Իսրայելը կտրականապես դեմ է Իրանի հետ միջուկային նոր համաձայնագրի կնքմանը», – հայտարարում է այդ երկրի վարչապետ Նաֆթալի Բենեթը։
«Մենք հետևում ենք Վիեննայում ընթացող բանակցություններին, և այն, ինչ մենք տեսնում ենք, մեզ լրջորեն մտահոգում է։ Իսրայելի և կայունության ջատագով մյուս մերձավորարևելյան ուժերի մոտ տպավորություն է ստեղծվում, որ ուրվագծվող համաձայնագիրը նպաստելու է ավելի փխրուն և բռնություններով լի տարածաշրջանի ձևավորմանը։ Կասկած չկա, որ Միացյալ Նահանգները շարունակելու է մնալ մեր ամենամեծ և ուժեղ բարեկամը։ Դրա հետ մեկտեղ, պետք է հասկանալ, որ մենք ենք ապրում այս տարածաշրջանում, և հենց Իսրայելն է, որ կրելու է կնքվող համաձայնագրի ողջ ծանրությունը», – Ամերիկայի հրեական կազմակերպությունների ղեկավարների հետ Երուսաղեմում կայացած հանդիպման ժամանակ հայտարարել է Իսրայելի վարչապետը։
Իրանի և միջազգային հանրության ներկայացուցիչների միջև բանակցություններն Ավստրիայի մայրաքաղաքում վերսկսվեցին փետրվարի սկզբին։ Նախորդ շաբաթավերջին Եվրամիությունը, Ռուսաստանն ու Իրանը ներկայացնող բարձրաստիճան դիվանագետները հայտարարեցին, որ բանակցությունները մուտք են գործել եզրափակիչ փուլ։
