Փետրվարի 21-ի երեկոյան ինքնահռչակ Դոնեցկի և Լուգանսկի հանրապետությունները ճանաչելու մասին Ռուսաստանի նախագահի հայտարարությունների ֆոնին ռուսական ռուբլու ժամանակավոր անկայունությունը հասել է 33,97 տոկոսի, վկայում են Bloomberg բորսայական տերմինալի տվյալները։
Նվազել է նաև ռուսաստանյան բորսաների ինդեքսը։ Մոսկվայի բորսայի ինդեքսը հիմնական նստաշրջանի բացման ժամանակ նվազել է ավելի քան 7 տոկոսով, Ռուսաստանի ֆոնդային շուկայի հիմնական ցուցանիշը՝ ավելի քան 8 տոկոսով։
Դոլարի փոխարժեքն աճել է 0,3 տոկոսով և գերազանցել 80 ռուբլին։ Եվրոն թանկացել է 0,5 տոկոսով և մոտեցել 90 ռուբլի 70 կոպեկի։
Ռուսական պետական պարտատոմսերի գների ինդեքսը երեքշաբթի առուվաճառքի սկզբում կորցրել է 3 տոկոս և իջել մինչև 2015 թվականի հոկտեմբերին արձանագրված ցուցանիշը։
Պետական արժույթի աճող անկայունության ֆոնին Ռուսաստանի Կենտրոնական բանկը հայտարարել է ֆինանսական հատվածին աջակցելու մասին։ Մասնավորապես, մինչև հոկտեմբերի 1-ը ֆինանսական հաստատություններին թույլատրվում է բաժնետոմսերի և պարտատոմսերի շուկայական արժեքով հաշվետվություն ներկայացնել փետրվարի 18-ի դրությամբ։
