Ուկրաինայի ազգային անվտանգության և պաշտպանության խորհուրդը որոշել է ամբողջ երկրի տարածքում արտակարգ դրություն սահմանել: Որոշումը չի տարածվում ռուս անջատականների հսկողության տակ գտնվող և Ռուսաստանի կողմից որպես անկախ պետություններ ճանաչված Դոնեցկի և Լուգանսկի շրջանների վրա:
Ազգային անվտանգության և պաշտպանության խորհրդի քարտուղար Ալեքսեյ Դանիլովն ասել է, որ հարկ եղած դեպքում Ուկրաինայի շրջաններում կմտցվի նաև պարետային ժամ:
Ուկրաինայի նախագահ և զինված ուժերի գերագույն գլխավոր հրամանատար Վլադիմիր Զելենսկու հրամանով սկսվել է 18-ից 60 տարեկան պահեստազորի զինծառայողների զորակոչը։ Այս մասին հայտնել է Ուկրաինայի զինված ուժերի գլխավոր շտաբը:
Ազգային անվտանգության և պաշտպանության խորհրդի քարտուղար Ալեքսեյ Դանիլովի փոխանցմամբ, Ուկրաինայում կարող է նաև համընդհանուր զորակոչ հայտարարվել, սակայն այս պահին նման որոշում չկա:
