Ռուսաստանն արգելանք է դրել ՄԱԿ-ի Անվտանգության խորհրդի բանաձևի վրա

Loading...

Երեք պետություններ ձեռնպահ են մնացել

ՄԱԿ-ում Ռուսաստանի մշտական ներկայացուցիչ Վասիլի Նեբենզյան երեկ երեկոյան արգելանք է սահմանել Անվտանգության խորհրդի բանաձևի վրա, որով պետք է դատապարտվեր Ռուսաստանի ագրեսիան Ուկրաինայում:

Միացյալ Նահանգների և Ալբանիայի կողմից ներկայացված նախագծի օգտին քվեարկել է ՄԱԿ-ի Անվտանգության խորհրդի 15 անդամներից 11-ը, Չինաստանը, Հնդկաստանը և Արաբական Միացյալ Էմիրությունները ձեռնպահ եմ մնացել, իսկ Ռուսաստանը դեմ է քվեարկել:

Քանի որ Ռուսաստանը ՄԱԿ-ի Անվտանգության խորհրդում վետոյի իրավունք ունեցող հինգ մշտական անդամներից մեկն է՝ բանաձևը չի ընդունվել:

Այդ իրավունքն ունեն նաև Միացյալ Նահանգները, Մեծ Բրիտանիան, Ֆրանսիան և Չինաստանը:

Դեռ քվեարկությունից առաջ հայտնի էր, այս բանաձևը չի ընդունվի: Նեբենզյան շնորհակալություն է հայտնել «այն երկրներին, որոնք չեն սատարել հակառուսական բանաձևը»:

«Անվտանգության խորհրդի մի անդամ տապալել է աշխարհակարգը»

«Ձեր վետոն չի լռեցնի մեր ձայնը, մենք միավորվել ենք և պաշտպանում ենք Ուկրաինան և այդ երկրի ժողովրդին, չնայած այն բանին, որ Անվտանգության խորհրդի մշտական անդամ մի անպատասխանատու երկիր դիմել է անխհեմ գործողության, հարձակվել է հարևանի վրա դրանով տապալել է ՄԱԿ-ի ու ամբողջ աշխարհակարգի հիմքերը»,- հայտարարել է ՄԱԿ-ում Միացյալ Նահանգների մշտական ներկայացուցիչ Լինդա Թոմաս-Գրինֆիլդը:

Նրա խոսքով զարմանալի չէ, որ Ռուսաստանն օգտվեց վետոյի իրավունքից և փորձում է արդարացնել «կանխամտածված անխիղճ պատերազմն Ուկրաինայում»:

«Թույլ տվեք մի բան հստակեցնել. դուք չեք կարող վետո դնել ճշմարտության վրա, մեր սկզբունքների վրա, Ուկրաինայի ժողովրդի և ՄԱԿ-ի Կանոնադրության վրա: Վետո չեք դնի պատասխանատվության վրա։ Դժվար է պատկերացնել, թե ինչ զգացողություն պետք է ապրեն մարդիկ, տեսնելով իրենց քաղաք մտնող տանկերը, փողոցների վրա ընկնող ռումբերը, թաղամասերի, այգիների ու բակերի վրա գրոհող զինվորներին: Բայց Ուկրաինայի ժողովուրդը պաշտպանում է իր երեխաներին, իր երկիրն, այն ամենն, ինչ թանկ է համարում»,- ասել է Լինդա Թոմաս-Գրինֆիլը:

Նա իր խոսքում նաև գովեստով է խոսել Ռուսաստանում պատերազմի դեմ բողոք հայտնած հազարավոր մարդկանց քաջության մասին, ասելով, որ նրանք անտեսել են սպառնալիքները ռեժիմի կողմից և համարձակվել են դատապարտել Պուտինի նախաձեռնած պատերազմը:

«Այդ դու՞ք պետք է մեզ բարոյականության դասեր տաք»

Արձագանքելով Միացյալ Նահանգների ներկայացուցչին, Նեբենզյան ասել է, որ այսօրվա ողբերգության համար մեղավոր են Արևմուտքը և Ուկրաինայում ութ տարի առաջ հեղաշրջմամբ իշխանության եկած ուժերը:

«Դուք՝ բացարձակ չմտահոգվելով Ուկրաինայի ժողովրդի մասին, ձեր աշխարհքաղաքական խաղերում Ուկրաինան դարձրել եք խաղազինվոր: Ձեր այսօրվա բանաձևը ոչ այլ ինչ է, եթե ոչ ևս մեկ քայլ այս դաժան և Ուկրաինայի համար հակամարդկային շախմատային պարտիայում»,- ասել է Նեբենզյան:

Ռուսաստանի մշտական ներկայացուցիչը նաև ուղիղ Վաշինգթոնին է հասցեագրել իր քննադատությունը, նշելով, որ այդ երկիրը բազմաթիվ պատերազմներ է վարել:

«Ես ձեռնպահ կմնամ թվարկել այն ագրեսիաները, որոնք Ամերիկայի Միացյալ Նահանգներն իրականացրել է իր պատմության ընթացքում։ Այդ դու՞ք պետք է մեզ բարոյականության դասեր տաք»,- հռետորական հարց է Լինդա Թոմաս-Գրինֆիլին տվել Վասիլի Նեբենզյան:

ՄԱԿ-ի Անվտանգության խորհրդի նիստում հատուկ ուղերձով հանդես է եկել Չինաստանի մշտական ներկայացուցիչ Չժան Ցզյունը: Նրա խոսքով Պեկինը խիստ մտահոգված է Ուկրաինայի խնդրով:

Նա կողմերին կոչ է արել դրսևորել առավելագույն զսպվածություն և բանակցություններով լուծել վեճերը: Նա նշել է, որ Ուկրաինայի խնդիրը ոչ թե այսօր է ծագել, այլ մի շարք գործոնների հետևնաք է:

«Ուկրաինան պետք է լինի Արևմուտքի և Արևելքի կամուրջ, այլ ոչ թե ճակատային գիծ»

«Չինաստանը վստահ է, որ մի երկրի անվտանգությունը չպետք է ապահովվի մյուսի հաշվին: Այդ առումով պետք է ասել, որ ՆԱՏՕ-ի հինգ փուլերով ընդարձակումը դեպի արևելք առաջացրել է Ռուսաստանի օրինական մտահոգությունը, որն անհրաժեշտ էր լրջորեն ընդունել և պատշաճ կերպով քննարկել: Ուկրաինան պետք է լինի Արևմուտքի և Արևելքի կամուրջ, այլ ոչ թե մեծ տերությունների հակամարտությունների ճակատային գիծ»,- հայտարարել է Չժան Ցզյունը:

Նա կոչ է արել խնդիրը լուծել երկխոսությամբ ու բոլոր կողմերի անվտանգությունը և շահերը հաշվի առնելու հավասարակշռված սկզբունքով:

Չընդունված նախագծով Անվտանգության խորհուրդը պետք է պահանջեր Ռուսաստանից անհապաղ դադարեցնել ռազմական արշավը և Ուկրաինայի տարածքից դուրս բերել զորամիավորումները: Այժմ այս նախագիծը կփոխանցվի ՄԱԿ-ի Գլխավոր ասամբլեայում ներկայացված 193 պետությունների պատվիրակների ընդհանուր նիստին:

Լռության րոպե ՄԱԿ-ի Անվտանգության խորհրդում

Նյու Յորքում ՄԱԿ-ի Անվտանգության խորհրդում քվերակությունից առաջ Ուկրաինայի դեսպան Սերգեյ Կիսլիցան առաջարկել է լռության րոպեով հարգանքի տուրք մատուցել Ուկրաինայում զոհվածների հիշատակին: Նման բան ՄԱԿ-ի կանոնակարգով ընդհանրապես նախատեսված չէ:

Ռուսաստանի դեսպան Նեբենզյան, ով այս ամսվա ընթացքում հերթագայության կարգով նախագահում է խորհուրդը, առաջարկել է միաժամանակ հարգանքի տուրք մատուցել նաև Դոնբասում զոհվածների հիշատակին: Առաջարկն ընդունվել է, ինչից հետո լռության րոպե է հայտարարվել:

“24 saat”

Bənzər məqalələr

Թողնել պատասխան

Ձեր էլ-փոստի հասցեն չի հրապարակվելու։

Back to top button