Կիևը կոչ է արել Առևտրի համաշխարհային կազմակերպությանը դադարեցնել Ռուսաստանի անդամակցությունը՝ ի պատասխան Ուկրաինայի դեմ շարունակվող ռազմական գործողությունների։
«Հորդորում ենք ամբողջական տնտեսական էմբարգո սահմանել և չկիրառել ԱՀԿ համաձայնագրերը Ռուսաստանի հետ հարաբերություններում, – հայտարարել է Ժնևում ուկրաինական դիվանագիտական առաքելությունը, հավելելով, – մենք խորապես հավատում ենք, որ ԱՀԿ-ի մյուս անդամները կկանգնեն Ուկրաինայի կողքին՝ հակազդելու ագրեսոր պետությանը»:
Դեռևս հստակ չէ՝ ինչ ճակատագրի կարժանանա Կիևի այս հայտարարությունը։ Հայտնի է, որ 164 անդամ ունեցող ԱՀԿ-ում որոշումներն ընդունվում են միայն կոնսենսուսով: Մյուս կողմից, կանոնադրությունը չի խանգարում, որ միջազգային առևտուրը կանոնակարգող կառույցի որևէ անդամ այս հարցով քվեարկություն նախաձեռնի։
