Մոսկվայի քաղաքապետարանը պաշտոնապես մերժել է Ուկրաինայի դեմ պատերազմը դատապարտելու նպատակով մարտի 12-ին բողոքի երթ անցկացնելու «Յաբլոկո» կուսակցության դիմումը, որում երթի նպատակը նշվել է որպես «մոսկվացիների վերաբերմունքը հատուկ գործողության նկատմամբ»:
Ռուսաստանի իշխանություններն արգելում են Ուկրաինայի պարագայում կիրառել «պատերազմ» եզրույթը:
Քաղաքապետարանը մերժել է նաև մի խումբ ռուս ազգայնական հրապարակախոսների կողմից ներկայացված «Ժողովրդի և բանակի համերաշխության երթ» անվամբ միջոցառման հայտը:
Երկու մերժումներն էլ պատճառաբանվել են «համաճարակաբանական իրավիճակի» հանգամանքով:
Ընդ որում՝ ճիշտ նախօրեին Մոսկվայի իշխանությունները նշել են, որ կորոնավիրուսի հետ կապված իրավիճակը բարելավվում է և չեղարկել են սահմանափակումների մեծ մասն, այդ թվում՝ հանրային վայրերում QR-կոդեր ներկայացնելու պահանջը:
Մոսկվայում և ռուսաստանյան մի շարք այլ քաղաքներում փետրվարի 24-ից սկսած տեղի են ունենում ցույցեր և երթեր պատերազմի դեմ, ձերբակալված են հազարավոր ակտիվիստներ:
Այս օրերին տարածվում է մարտի 6-ին խոշոր երթ անցկացնելու կոչը: Ռուսաստանի գլխավոր դատախազությունը նախազգուշացնում է ապօրինի զանգվածային միջոցառումներին մասնակցելու համար նախատեսված դատական պատասխանատվության մասին:
