Միացյալ Նահանգների փոխնախագահ Քամալա Հարիսը համագործակցելու է Լեհաստանի և Ռումինիայի իշխանությունների հետ Ռուսաստանի կողմից հարձակման ենթարկված Ուկրաինային օգնություն տրամադրելու հարցում և հավաստիացնելու է, որ Վաշինգթոնը Մոսկվայի ներկայիս ագրեսիվ կեցվածքի կապակցությամբ միանշանակ սատարելու է այդ երկրւ երկրներին:
Հարիսը վաղը պետք է հանդիպի Լեհաստանի և Ռումինիայի ղեկավարների հետ: Մոսկվայի ագրեսիան խիստ անհագնստացրել է Վարշավային և Բուխարեստին, որտեղ չեն բացառում, որ ռուսները կարող են նաև մյուս ուղղություններով շարունակել ռազմական գործողությունները:
Երկու երկրներն անմիջական սահմաններ ունեն Ուկրաինայի հետ, որտեղից այս օրերին ընդունում են հարյուր հազարավոր փախստականների:
Հարիսը Լեհաստանի և Ռումինիայի ղեկավարների հետ կքննարկի Ռուսաստանի նկատմամբ տնտեսական պատժամիջոցների քաղաքականության հարցը:
Միացյալ Նահանգների փոխնախագահը Վարշավայում կհանդիպի նաև Ուկրաինայի խնդրով Լեհաստան այցելող Կանադայի վարչապետ Ջասթին Թրյուդոյին:
